ڪراچي (بيورو) سنڌ جي وڏي وزير سيد مراد علي شاهه چيو آهي ته ٻارن جي صحت جي بهتري لاءِ سندس لڳاتار ڪوششن سبب صوبائي حڪومت پنجن سالن ۾ هر هڪ هزار ڄاول ٻارن جي فوتگي شرح 104 مان گهٽجي 46 تائين پهچي وئي آهي. هن اها ڳالهه اڄ ڊاڪٽر رٿ فائو سول اسپتال ڪراچي ۾ چائلڊ لائيف فائونڊيشن پاران صوبي جي هر تعلقي ۾ موجود 100 اسپتالن ۾ ٽيلي ميڊيسن نيٽ ورڪ فراهم ڪرڻ بابت ڪوٺايل پروگرام کي خطاب ڪندي چئي. پروگرام ۾ صحت واري صوبائي وزير ڊاڪٽر عذرا فضل پيچوهو، چائلڊ لائيف فائونڊيشن جي باني ٽرسٽي، صحت واري سيڪريٽري ذوالفقار شاهه ۽ ٻين شرڪت ڪئي. وڏي وزير چيو ته صوبائي حڪومت 2010 ۾ چائلڊ لائيف سان ڀائيواري ڪئي جنهن جو مقصد هر سال 10 لک کان وڌيڪ ٻارن جي ايمرجنسي ڪيئر کي بهتر بڻائڻ آهي. سنڌ جي وڏي وزير چيو ته هن 2018ع کان صحت جي سهولتن جو اهڙو ڄار وڇايو ويو آهي جو ڪراچي ۾ ڪوبه ٻار عالمي معيارن موجب 24 ڪلاڪن جي مفت ايمرجنسي سهولت کان 30 منٽن کان وڌيڪ پري ناهي. هن چيو ته اسان ڪراچي جي پنجن سرڪاري اسپتالن ۾ ايمرجنسي رسپانس سروسز (ERs) قائم ڪيون آهن. ۽ وڌيڪ چيو ته 2019ع ۾ صوبي جي پنجن اسپتالن ڪراچي، حيدرآباد، شهيد بينظير آباد، لاڙڪاڻو، سکر ۾ اهي سهولتون فراهم ڪيون ويون آهن. ٽيلي ميڊيسن بابت ڳالهائيندي مراد علي شاهه چيو ته 2022ع تائين سنڌ جي سمورن ضلعن ۽ تعلقن جي هيڊ ڪوارٽرن ۾ ٽيلي ميڊيسن سيٽلائيٽس قائم ڪيا ويا آهن ۽ هاڻي 2023ع تائين سنڌ جي سمورن تعلقن ۾ قائم ڪيا ويندا. ٽيلي ميڊيسن سيٽلائيٽ سينٽر معيار کي بهتر بڻائي رهيا آهن جيئن ٻارن جي بيمارين جا ماهر مشورا ڏئي سگهن ٿا جتي 24 ڪلاڪ سهولت کليل هوندي. علاج لاءِ خاص وقت ۽ والدين تي وڏن شهرن ڏانهن سفر لاء ۽ سرڪاري ڊاڪٽرن جي نوڪري جي ڪوچنگ تي مالي ٻوجهه کان بچائي ٿو. ٻارن جي صحت ۾ سنڌ حڪومت جي ڪاميابين جو ذڪر ڪندي وڏي وزير چيو ته يونيسيف جي سهڪار سان 2021ع جي MICS سروي ۾ سنڌ ۾ 5 سالن دوران 1000 ڄاول ٻارن جي فوتگي شرح 104 مان گهٽجي 46 ٿي وئي آهي. اهو رڳو ان ڪري ممڪن ٿيو آهي ته سنڌ حڪومت ٻارن جي صحت خاص ڪري پبلڪ پرائيويٽ پارٽنرشپ پروگرامن ذريعي تي خاص ڌيان ڏنو. 2018 ۾ اڪانومسٽ انٽيليجنس يونٽ سنڌ کي ايشيا ۾ ڇهين بهترين پارٽنر قرار ڏنو. سنڌ جي وڏي وزير چيو ته سندس حڪومت چائلڊ لائف لاءِ ڀرپور سهڪار ڪيو آهي ۽ کيس ان جي ڪاميابين تي فخر آهي. هن چيو ته نيون عمارتون، مرمت ۽ سامان فرسٽ ايڊ طور موجود آهن پر اسان جو مقصد معياري صحت جي سهولت آهي. هن وڌيڪ چيو ته چائلڊ لائف معيار کي بهتر بڻائڻ لاءِ جدت استعمال ڪرڻ جو هڪ بهترين مثال آهي. وڏي وزير چيو ته آئون متاثر آهيان ته ڪيئن چائلڊ لائيف پارٽنرشپ جي هم آهنگيءَ جو فائدو وٺندي نتيجا حاصل ڪري رهيو آهي. هن وڌيڪ چيو ته هوءَ گهڻو پراميد آهي ته اهي ٻيو ڇا حاصل ڪري سگهن ٿا. وڏي وزير چيو ته گهڻو ڪم ٿي چڪو آهي ۽ اسان خاص ڪاميابيون به حاصل ڪيون آهن پر اسان وڌيڪ پراميد آهيون. ٻئي طرف سنڌ ڪابينا جوا جلاس ٿيو جنهن ۾ پنج ساله سنڌ هيومن رائيٽس پاليسي جي منظوري ڏني وئي. پاليسي ذريعي هيٺين طبقي جي ماڻهن جا مسئلا حل ٿيندا، پاليسي جي شقن ۾ عورتن، ٻارن، اقليتن ۽ ٻين جي حقن کي شامل ڪيو ويو.
